العودة   تراخيص نبض الكلمات منتدى الشعر والنثر والقصة قسم القصة

إضافة رد
   
أدوات الموضوع إبحث في الموضوع انواع عرض الموضوع

القلب الطيب
الصورة الرمزية القلب الطيب
عضو رائع

رقم العضوية : 5195
الإنتساب : Dec 2010
العمر : 68
المشاركات : 93
بمعدل : 0.02 يوميا

القلب الطيب غير متواجد حالياً عرض البوم صور القلب الطيب



  مشاركة رقم : 1  
المنتدى : قسم القصة
0 11 قصه مضحكه لدخول بنت صعيديه الجامعه
قديم بتاريخ : 01-25-2011 الساعة : 12:17 AM

النهرده انا جايبلكوا مسلسل جديد

المسلسل حلو اوي
هو عبارة عن قصه بنت صعيديه اسمها كريمه جالها جواب التنسيق على القاهرة و هناك هيحصلها مواقف و حاجات
هتموت من الضحك

يللا نبدأ بتعريف القصه و الاشخاص

قصه البت كريمه الصعيديه الى جالها التنسيق فى جامعه القاهره وسافرت عند عمها علشان تدرس
وقابلت بقى ميدو وحصلت اجمل قصه تعالوا نشوف

شخصيات القصه

كريمه



وميدو




جنى صديقه ميدو




ندى صديقه كريمه


الحلقه الاولى


جه جواب التنسيق لكريمه وفتحت الجواب لقت جامعه القاهره


كريمه : يادى النيله
ام كريمه : ايه يابتى مالك
كريمه : الحجى يامه جواب التنسيج جه القاهره
ام كريمه : وماله يابتى عمك هناك روحى عند عمك
كريمه : انا مش بطيج مرته دى الى عامله زى ام اربعه واربعين
ام كريمه :معلش يابتى ايام وجضيها وخلاص
كريمه :امرى لله انا عارفه حظى اسود من يومه
هروح وخلاص
وجه معاد السفر
ركبت كريمه القطر وفى طريقها للقاهره


كريمه : يا سوادى هى السكه مالها طويله جوى ليه كده يا مهون هون علشان انا زهجت ومليت من الجعده دى
وصلت كريمه وراحت عند عمها خبطت على الباب فتحت مرات عمها
كريمه : اهلا يا مرت عمى
مرات عمها : مين كريمه
كريمه : ايوه كريمه امال هيكون عفريتها ولا ايه
مرات عمها : ازيك يا بنتى منوره
عمها يجري على الباب و يقول مين
كريمه ازيك يا بتى واللي في البلدعاملين ايه
كريمه : طيب مش تدخلونى وبعدين تسلموا ولا هنجضيها سلامات من على الباب الشنطه خلعت كتفى

عمها : ادخلى يا بنتى اهلا وسهلا
ورحبوا بيها وسلمت على عمها واولاده
وتانى يوم كان الدراسه
صحيت بقى كريمه واستعدت وراحت على الجامعه مع عمها لانها متعرفش السكه دى اول مره هتروح فيها
وصلها عمها وشرحلها الطريق
دخلت كريمه الجامعه

لقت بنات بقى وشباب استايل اوى
اول مره تشوف كده
كريمه : وى وى وى وى وى يا بوى
ايه الى البنات عاملينه فى نفسهم ده

المحزج والملزج وايه الالوان الى فى شعرهم دى
استغفر الله العظيم يا ربى
والولاد مالهم كده مطولين شعرهم وموجفينه زى ما يكونوا مكهربين
دول ما يجلوش حاده عن البنات
عشنا وشفنا وانا مالى انا الحج بجى محاضراتى
ودخلت بقى كريمه قاعه المحاضرات
بتدور على مكان تقعد فيه
كريمه : ايوووووووووه يا ولاد ايه الى بيحصل ده
الاولاد جمب البنات كده وملزجين فى بعض
انا هجعد زيهم كده لا والله لا يمكن ابدا
انا هفضل واجفه احسن
دخل الدكتور لقى كل الناس اعده الا هى
بيقلها يا بنتى اعدى
كريمه : اجعد ازاى يا دكتور جمب الولاد كده عادى لا والله ما يحصل ولا يكون
الدكتور:ههههههه اعدى جمب اى بنت
طيب اى حد يا بنات يقعدها جمبه
وحده من البنات قالتلها تعالى هنا جمبى
اعدت كريمه واتعرفت عليها انتى اسمك ايه قالتلها اسمى ندى وانتى قالتلها كريمه المهم بعد ما خلصت المحاضره اتعرفوا على بعض وبقوا صحاب اوى
وخلص اليوم وخلصت المحاضرات وجه معاد انها تمشى لبيت عمها
خرجت كريمه هى وندى
وبعدين



تانى يوم راحت بقى كريمه على الجامعه
اول اما خلصت اول محاضره
كريمه : يا ندى انا جعانه جوى تعالى نجيب اى حاجه ناكولها
ندى: خلاص تعالى يا كريمه نروح كافتريا الكليه





راحت كريمه وندى الكافتريا و اول اما اعدوا كان اعد قصادهم مين عمنا ميدو بقى

ميدو اول اما شاف كريمه اعد يضحك بقى بصوت عالى
كريمه بصتله بقرف اوى وقالت
هوه ماله الواد ده الى شبه الديك الازعر بيضحك ليه كده
ندى : احنا مالنا يا كريمه هوه بيضحك وخلاص
كريمه : ليه يا بت شايفنا ارجوزات جودامه ده واد حيوان وعايز يتهزج
ندى : بصى احنا ناكل ونمشى من هنا
كريمه : طيب احسن بردو انا جولتلك بيومك لاسود ده انا مش هاجى الكافتريا دى
خلصوا اكل ودخلوا قاعه المحاضرات

واعدوا دخل طبعا وراهم الاستاذ الفاضل ميدو وكانت معاه وحده صحبته
وشاف كريمه بردو واعد يشاور عليها ويضحك
كريمه اتنرفزت اوى طبعا والعرق الصعيدى طلع
كريمه : بصى يا بت يا ندى بيعمل ايه الواد ده بيضحك تانى
قالتة ندى
انت حضرتك بتضحك ليه
ميدو : ههههههههههههه لا ولا حاجه يا انسه ههههههه
كريمه : فرحان جوى وانت فاتح خشمك كده جاتك نيله عليك وعلى بوزك الفجرى
ميدو : وليه الغلط يا ااااااااا؟
كريمه : يا اااااااا ايه ما تنطج
ميدو : يا حجه هههههههه
كريمه : تعرف انك مش محترم وعيل جليل ادب وعايز تتربى
ميدو: انتى انتى انتى تربينى انا
وطبعا الاستاذ ميدو بيستفزها بمياعته وبالحركات الى بيعملها
ندى : طيب ممكن اعرف بتضحك ليه
ميدو: انتى مش شايفه جمبك تحفه فنيه بجد ههههههه
كريمه : تحفه فنيه ما تحطنى فى متحف الشمع يا خوى
انا تحفه وانت تيجى ايه بشعرك الى مكهربه ده وبنطلونك الى هيوجع منك ارفع بنطلونك وبعدين اتكلم
ميدو طبعا مش معاه غير انه يضحك هوه وصحبته
كريمه : يلا يا ولاا انت خد الفرخه بتاعتك دى وغور من هنا اتكشح يلا
ميدو : دى فرخه دى جنا صحبتى


كريمه : جنا ولا عفريت وانا مالى غور احسن افرج عليك الجامعه كلها
ميدو : انا مش هرد عليكى انتى مش من مستوايا
كريمه : مستوى مين يا بو مستوى انت يا حوساله وعره الشباب كمان ولو شفت وشك هنا هضربك بالبولغه
ندى : خلاص يا كريمه هوه فعلا مش محترم بس انتى بردو نرفزتية
كريمه : انتى مش شايفه حيلت امه بيعمل ايه
ندى : معلش
المهم ندى هدت كريمه وخلصوا محضراتهم ورواحوا


بعد اما خرجت كريمه من الجامعه علشان تروح

خرج وراها طبعا عمنا ميدو هوه وجنى صحبته بالعربيه بتاعته

واعد يرخم عليها ويدايقها

كريمه: انت يا واد احترم نفسك وامشى بعيد عن هنا بدل

ميدو : بجد انا مش هسيبك انهرده هوه الضحك عليكى انهرده هخليكى تحرمى تكلمينى باسلوب مش كويس يا انتى

كريمه : والله انت شكلك كده جبته لنفسك فى يومك ده ونويت تحجز

لنفسك سرير ونفر زياده فى المستشفى

جنى : الحق يا ميدى دى بتقول هتدخلك انت مستشفى



كريمه: الحجونى يا ناس الولا ده بيتحرش بيا وبيجولى كلام جلت ادب وخدش حيائى الحجوووووووووووووونى

طبعا كريمه اعدت تصوت والناس اتلمت عليها وضربوا ميدوا



ادوله علقه سخنه وجنى مش معاه غير انها تصوت

جنى : يا وحوش حرام عليكوا هوه مش قدكوا

كريمه : مش جدهم علشان يحرم تانى مره

كده هوه اتعلم الادب

ومشيت كريمه وجنى اتصلت بالاسعاف جم خدوا ميدو

بعد اما روحت كريمه عند بيت عمها

مرات عمها فتحتلها الباب بتقلها ازيك يا كريمه

كريمه طبعا مش ردت ودخلت وهى بتقول كلام كده مش مفهوم

( انا كان مالى ومال البلد بت الدزمه دى شكلى كده هتبجى وجعتى سوده ما انا كنت فى بلدى

وجاعده كويسه بس بردو مش فشيت غليلى اةةةةةةةةةة يا بوى )

مرات عمها دخلت قالت لعمها بقى

عمها راح لكريمه

عمها : مالك يا بنتى مرات عمك بتقول انك مدايقه

كريمه : ماليش ياعمى

( فى سرها طبعا بتقول : روح بعيد كده مش ناجصاك انت كمان وكمان مرتك لحجت

توصلك لسانها مش بيتبل فيه فوله ربنا ياخدها )

عمها : لا بجد احكيلى يا بتى

كريمه :الولاد عندكوا ياعمى البنات ارجل منهم يا بوى واد ياعمى مش محترم جل ادبه عليه

عمها : ليه يا بتى انتى عملتيلوا ايه

كريمه : معملتلوش حاجه والله ( وحكت كريمه لعمها الى حصل )

عمها : طيب ليه يا بنتى كده ده تلاقى الشباب بهدلوه خالص

كريمه : احسن انا كمان مش فشيت غليلى انا كان نفسى ا

مسكوا من شعره الى ماسكاه الكهربه ده واجصهوله

خالص واعمل فى الناس جميله بادل ما تتازى من شكلوا العفش يا رب يكون مات علشان

ارتاح من خلجته الفجريه

طبعا ميدو اعد فى المستشفى حوالى 15 يوم ومش بيجى الجامعه خالص


وكريمه حكت لندى الى حصل ندى

ندى : على فكره يا كريمه هوه غلط بس مش لدرجه انك انتى تخلى الشباب يموتوه كده خالص

كريمه : استفزنى جوى يا ندى والله خلانى فجت اعصابى

ندى: خلاص بصى انتى تيجى معايا نروح نزوره فى المستشفى

ونعتزرله ونهدى الموضوع ونصلح الى حصل

كريمه : انتى حسستينى بالزنب انا خلاص هروح معاكى بس مش هعتزر لحد انا هشوفه بس واطمن عليه

ندى : خلاص اوك هنروح انهرده بعد المحاضرات

كريمه : ماشى يا ستى

راحت ندى وكريمه المستشفى وجابوا ورد وهمه رايحين


دخلت ندى عند ميدو وحدها وقالت لكريمه خليكى انتى هنا اما اندهلك ادخلى

كريمه : بس خلى فى بالك يا بت انا مش جايه معاكى علشان اعتزرله علشان ضميرى بيوجعنى بس مش اكتر

دخلت ندى

ندى : (فى سرها طبعا: يا لهوى ده ميدو مكسر خالص يخرب بيتك يا كريمه

ايه الى عملتيه ده فى الولا)

ازيك يا ميدو عامل ايه

ميدو: اهلا يا ندى انا خلاص مبقتش انفع تانى صحبتك المتوحشه شوفى عملت فيا ايه


ندى :معلش يا ميدو انت نرفزتها وكمان انا عملالك مفجأه ( ادخل ياسمسم )



ودخللت كريمه وتحصل المفاجأه ................




بعد ما دخلت ندى وشافت ميدو مكسر خالص

ندهت على كريمه

ندى : ادخل يا سمسم

كريمه طبعا داخله وماسكه الورد وهى عامله نفسها غلبانه بقى ومكسوره ميدو شفها بقى


وحصلت المفجأأأأأأأأأأأه

ميدو : يا ماااااااااااااااااااااااااامى الحقونى حوشوا المتوحشه دى خرجوها بره

صرخ طبعا كأن جاتله حاله صرع

كريمه : ايه يا واد انت مالك شفت عفريت ولا دينسور دخل عليك دول حتى اختفوا من زمان

ندى: اهدى يا ميدو مش كده دى جايه تعتزرلك

ميدو : لا مش عايز منها اعتزار ولا حاجه خرجوها

كريمه : انا جولتلك مش هاجى عند الواد الرمه دى بخلجته الملخبطه ده ولد امه دزمه ومش راجل خالص

ندى : خلاص بقى انتوا لتنين

هدت ندى الموقف واعدوا يتكلموا همه التلاته

دخلت بقى جنى


جنى : هاى ميدو ايه ده يا مامى ايه الى جاب دى هنا

كريمه : مالك ياختى اتخضيتى تفى فى عبك ولا اجيبلك طاسه الخضه

ميدو : اهلا يا جنى دى كريمه وندى جم علشان نتصالح سوى وخلاص بقينا اصحاب

كريمه :يلا بجى يا ندى نمشى ما المثل بيجول اذا حضرت الشياطين ذهبت الملائكه

واهى الشياطين جات

وهى خارجه زقت جنى وقعتها على الارض

وقالتها غورى بخلجتك الوحشه دى

وبعد كم يوم خرج ميدو من المستشفى وراح الجامعه وطبعا اول اما شاف كريمه وندى

راح سلم عليهم واعدوا يتكلموا وجات جنى


جنى : هاى شله فيه رحله مطلعاها الجامعه لشرم مين هيجى معانا

ميدو : كلنا طبعا جايين احجزيلنا معاكى كلنا

ندى : انا موافقه

كريمه : موافجه ايه روحوا لوحدكوا انا مش هروح مستحيل طبعا

ندى : ليه يا كريمه نغير جو كده كم يوم

كريمه : انسدى يا بت انتى واجفلى خشمك ده مش هروح جلتلك

طبعا كلهم مصرين ياخدوا كريمه وندى اتصلت بعمها علشان يقنعها

عمها : ماتروحى يا بنتى تغيرى جو كده مع صحابك

كريمه : فى سرها بتقول ( والله الراجل ده شكله عايز يخلص مانى ده شكله ما صدق

يا سوادى علشان اريحه ليه انا مزهجاه للدرجه دى خلاص هروح وامرى لله )

خلاص ياعمى موافجه هروح وبعد معاناه وافقت كريمه تروح الرحله

وفى يوم السفر حضرت بقى كريمه شنطتها

واتجمعوا هى وندى وجنى وميدو وباقى اصحابهم عند الجامعه وركبوا الاتوبيس

وبعدين




وفى الاتوبيس طبعا البنات اعدةا بقى يرقصوا همه والشباب ويغنوا


كريمه مش عجبها الوضع ده خالص عماله تتكلم بقى فى سرها وتقول

( ووىوىوى وى ايه المسخره وجله الادب دى معدش فيه حيى خالص البنات ماالها ببترجص

وتتلوىزى التعابين كده ليه وكمان الولاد عمالين يتمايعوا كده ومفيش خشى خالص

دول رايحين رحله ولا كباريه يادى السواد الى انا فيه )

طبعا جنى الرخمه حبت ترخم على كريمه فا اعدت تشد فيها بقى علشان تيجى ترقص

جنى: يلا بقى يا شباب عايزين كريمه عايزين كريمه

كريمه : هى كريمه الرجاصه الى جابهالك ابوكى ولا ايه يا بت انتى اخرسى

احسن اجطعلك لسانك ده المعوووج يادى الفضيحه ام جلاجل ياجى الجرسه ام حناجل

عايزانى اترجص يا بت زيكوا انت انهبلتى ولا ايه

انت عارفه دول لو عرفوا فى البلد يطخونى بالنار

ويخلصوا من عارى

الولاد طبعا : عايزين كريمه

كريمه : هوه اسمى بجى لبانه فى خشمكوا والله الى هينطج اسمى

هتبجى وجعته سوده انهرده بجوطران

ندى : خلاص يا جماعه معلش سيبوا كريمه

كريمه طبعا طول السكه متغازه اوى من الى حصل

وبتقول فى سرها (جال ارجص جال الهى تجرصهم حيه جولالات الخشى

انا كان مالى ومال المياعه دى يا ربى شكلها هتبجى رحله سوده بطين وجوطران

يا رب عدى الايام دى على خير وهى السكه دى كمان مالها طويله ليه انا

زهجت دى وجعه سوده ومنيله )

ميدو اما شاف كريمه اعده ومتنرفزه اوى راح اعد جمبها

وبيكلمها

ميدو : مالك يا كريمه متنرفزه ليه

كريمه : انت يا واد انت ازاى تجعد جمبى كده من غير خشى جوم يلا فز من هنا

ميدو : احنا اصدقاء يا كريمه ومتخافيش انا هقعد باحترامى

كريمه : ماشى ازا كان باحترام ماشى بس يلا لخص وجول الى عايز تجوله

وفضها سيره مش تاخودها حلوانه فى سلونه وتوجعد

ميدو : ههههههه اوك ماشى

انتى مالك بقى زعلانه ليه

كريمه : انت مش شايف جله الحى دى

ميدو : انتى مالك كده خودى الامور عادى فرى

كريمه : فرى ولا سافو يا واد جوم من هنا

ميدو : انتى ليه مقعده

كريمه : انا معجده طيب ماتفوكنى يا خوى مش بجولك الى انا عملته فيك ده جليل

االست جنى بقى اول اما شافت ميدو اعد مع كريمه اتنرفزت اوى وراحت تقله

ميدو انت ايه الى مقعدك هنا

كريمه : جال يا جاعدين يكفيكوا شر الجايين انا من الاول مش مرتحالك انتى بهدومك المجطعه دى

جنى : انا هدومى مقطعه

كريمه : يا بت غورى اتبطى كده واجدعى بعيد

جنى : انتى بتكلمينى انا

كريمه : امال بكلم امى هوه فيه دزمه جودامى غيرك

غورى يا بت بعيد من هنا احسن اعملك عاهه

ميدو : جنى روحى شوفى زمايلك لو سمحتى عايز اعد مع كريمه

كريمه : لا مش هتجعد يالا انت كمان يا واد يا رمه خد الدزمه دى وامشى غوووووووور

ووصلوا بقى وادخلوا الفندق الى هيقعدوا فيه



طبعا بدأ توزيع الاوض ومن المفروض كل 3 بنات فى اوضه

جه حظ بقى ندى وكريمه وجنى فى اوضه سوى

كريمه رافضه تماما ان جنى تقعد معاهم فى الاوضه

كريمه : مستحيل ام سحلول دى تجعد معانا فى اوضه وحده

هى مش ناجصه سجالى هنا

جنى : وانا بقى مش هقعد غير هنا هى اوضه اهلك انتى

كريمه: انتى تعرفى اهلى منين يا بت تغلطى فيهم

اهلى لو شافوكى كانوا تاوكى من زمان ولاحد يعرفلك طريج

طبعا المشرفه سمعت الخناقه جت هدت الموقف

واقنعت كريمه ان ده ترتيب غرف ومينفعش يتغير

دخلوا ورتبوا هدومهم ونزلوا المطعم اتغدوا

وبعد كده كان باقى اليوم يقضوه على البحر

راحوا كلهم والبنات بقى والاولاد لبسوا الميوهات ونزلوا البحر الا كريمه

كريمه : ايه الى انا شيفاه ده الله يخرب بيت الى جاب ابوكم كده من غير خشى

عارايه من غير هدوم جودام بعض استر يا رب على النعمه دى علامات يوم الجيامه

كاسيات عاريات ربنا ياخدكم يا جولالات الادب استر يا رب

ندى : ايه يا كريمه مش هتنزلى البحر يلا البسى المايوه بتاعك

كريمه : ميوه ايه يا بت انت يام مايوه وانا الى فاكراكى مؤدبه طلعتى زيهم بالظبط

ندى : ليه بس انا الميوه بتاعى مش مكشوف اوى ده اسلامى

كريمه : عشنا وشوفنا حتى الميوه عملاوه اسلامى اوعى تجيبى سيره الدين على لسانك

انتى يا نيله وغورى من وشى الساعادى

مشيت ندى واعدت كريمه لوحدها تحت الشمسيه متغاظه ومش عاجبها الوضع خالص

جالها ميدو وبيكلمها

ميدو : كريمه مالك مش نازله ليه البحر

كريمه : ماهى ناجصاك انت كمان غور يا ولا اتحشم والبس اى حاجه على جسمك ده

وانت عامل زى البرص الجعان

ميدو : انا برص جعان يا سو سو

كريمه : سوسو ليه شايفنى شغاله فى كاباريه اتلم يا ولا ايوه برص جعان

وكمان مسلوخ ومعفن وريحته وحشه

ميدو : ههههههههههه مقبوله منك تعرفى انا مش ازعل منك لانك انتى دمك خفيف موت

وانا احب البنات الى كده

كريمه : يا دى النيله ده هيجعد وهيتساير معايا وانا اصلا مش طايجاه روح يا شاطر

خد الطوج بتاعك وروح عوم يا رب تغرج وارتاح من وشك الفجرى ده

ميدو : لا انا اعد معاكى شويه اسمحيلى

كريمه : تجعد بادبك وغطى جسمك ده

ميدو : حاضر يا ستى

( طبعا ميدو اعد هوه وكريمه واعدوا يحكوا لبعض عن حياتهم واخواتهم

وكده وبيعرفوا كل حاجه عن بعض يعنى شكله الموضوع كده قلب على اعجاب وربنا يستر )

عدى اليوم وراحوا الفندق واتعشوا ودخلوا اوضهم بقى علشان يرتاحوا

كريمه: بتحكى لندى عن ميدو بتقلها الولا محمد ده طلع كويس والله وشكله غلبان

وطيب بس لو يبطل الحاجات الى بيعملها دى هيبجى كويس

ندى : ايه يعنى فكرتك اتغيرت عنه وكمان بتقولى محمد

كريمه : هى اتغيرت حبتين بس بردو لسه وكمان اسم محمد احسن من ميدو المياعه دى وجله الادب

سمعتهم طبعا الهانم جنى وهمه بيحكوا طبعا جنى بتحب ميدو اتنرفزت

وحست ان هيحصل شىء بينه وبين كريمه فا ردت عليهم

جنى : انتوا بتكلموا عن ميدو ليه وبعدين انتى اوعى تكلميه تانى يا انتى

كريمه اتنرفزت وبصت لندى وجالت هى البت الدزمه الزباله دى بتكلم مين انا ولا انتى

ندى : بتكلمك انتى ههههههههه

كريمه : بصت لجنى وقالتلها عايزه ايه انتى يا ام سحلول

جنى : عايزه مش تكلمى ميدو تانى فهمتى ولا لا

كريمه : يا بتى جلتلك الف مره اتجى شرى انتى مش بتسمعى الكلام

وشكله كده يومك خلص على ايدى

جنى : انا بقلك اهوه وبلاش تكلميه تانى يا بارده

كريمه: انا بارده يا بت ده انتى لو حطوكى فى فرن درجه حرارتها الف مئويه تجمديها

وبعدين فهمينى مين ميدو ده الى انتى بتتخانجى معانا علشانه

جنى : ميدو حبيبى

كريمه : حبك برص يا سحليه جربانه انتى ميدو ده واد دزمه وانتى البولغه بتاعته

وغورى من وشى روحى اتخمدى

ندى طبعا ميته على نفسها من الضحك على الى بيحصل

المهم خلص اليوم بالمناقشه الحاره علشان الكابتن ميدو

وجه تانى يوم فى الرحله الى هوه المفروض انه يوم رحله سفارى فى الصحرى

وركوب جمال وكان يوم جميل



وجه تانى يوم الى هوه يوم رحله السفارى وركوب الجمال

تعالى نشوف حصل ايه

صحيوا الصبح ولبسوا ونزلوا يفطروا

ندى بصت لكريمه لقيتها لابسه لبسها المعتاد الى هوه جيب وجاكت

استغربت اوى وراحت تكلمها

ندى : كريمه ايه الى انتى لابساه ده

كريمه : ماله الى انا لابساه ده وحش ولا ايه

ندى : لا مش وحش بس مينفعش تركبى بيه جمل اوى تطلعى سفارى خالص لازم تلبسى بنطلون

كريمه : البس بنطلون ليه حصل ايه فى الدنيا

اتهببى واسكتى يا بت وانا اصلا مش هركب جمل ولا حتى السفارى دى كمان وغورى من وشى

ندى : مينفعش يعنى هنسيبك لوحدك فى الصحرى

كريمه : خلاص مش اروح خالص واجعد هنا

ندى : لا بصى انا هجيبلك بنطلون من عندى بس واسع والله ومش ضيق تعالى شوفيه

ولو مش عاجبك مش تلبسيه

كريمه : تعالى اما اشوف انا عارفه انها رحله سوده من الاول ومحدش مصدجنى خالص

(كريمه اختارت طبعا اوسع بنطلون عند ندى وكمان لبست فوق منه فست طويل بس

الحمد لله انها وافقت تلبس البنطلون بعد اقناع شديد)

وراحوا بقى وهناك ركبوا الجمال الا وحده بس الاستاذه جنى خايفه طبعا من الجمل

جنى : يا مامى انا اركب ده لالالالالالا مقدرش انا اخاف منه

كريمه بقى شافت الموقف واتنرفزت منها

كريمه : متركبى ياختى وتخلصينى خلينا نتحرك ونمشى

جنى : انتى مالك يا انتى انا مش اركب مقدرش اخاف انا

كريمه : طيب جيبولها طاسه الخضه المحروسه على شبابها

يابت الناس اركبى ده اليف مش يعضك والله انا حاسه بالجمل هوه خايف منك احسن انتى تعضيه

جنى طبعا رافضه اقنعها احدى المشرفين انها تركب مع حد من زمايلها طبعا جنى اختارت ميدو

كريمه شافتها بتركب مع ميدو اتنرفزت هى كمان

كريمه : والله انا بجول ان البت دى دزمه هى مش خايفه اصلا انا عارفاها هى

عايزه تتلزج فى الولا الى اسمه ميدو شوفى يا بت يا ندى عامله ايه البت ما صدجت

تلزج فيه يادى النيله بنات اخر زمن

( كريمه شكلها متغاز علشان ميدو حاسه كده ان القلب بدأ يدق اما نشوف بقى )

خلص بقى موضوع الجمال وجه معاد رحله السفارى وكل اتنين يركبوا سوى

وركبت ندى وكريمه وجنى طبعا مع ميدو وانطلقت الرحله كريمه كانت خايفه من موضوع

السفارى ده لانها اول مره تطلع رحله سفارى وانطلقوا بقى

كريمه : بالراحه يا بت يا ندى بالراحه يا دزمه يومك اسود شكلك هتموتينا بدرى

ندى طبعا فرحانه اوى ومش شايفه قدامها وكريمه عماله تلطم بعدها بقى ندى مشيت بالراحه

علشان كريمه لغايه اما صحابهم كلهم مشيوا وهمه لقيوا نفسهم لوحده وسط الصحرى

ومش عارفين يرحوا فين وتاهوا

ندى : كريمه انا مش عارفه همه مشيوا منين

كريمه : يعنى ايه

ندى : شكلنا كده تهنا مش هنعرف نرجع

كريمه : انا عارفه انا كان مالى ومال السفارى والنيله المنيله

بهباب دى ما انا كنت فى بيتنا مرتاحه مالى ومال مصر ومال الرحلات

ندى : ما كفايه خلينا نركز بقى نشوف هنعمل ايه

كريمه : تعملى ايه اتصلى بالموبيل الى معاكى ده باى حد قبل الليل ما يدخل

ندى : اتصلت بميدو الو ايوه يا يا ميدو بص احنا فى الصحرى ومش عارفين نروحلكوا او نرجع احنا تهنى

ميدو : طيب انتوا فين بالتحديد

ندى: مش عارفه

كريمه : هاتى اشوفه الدزمه ده انت يا بنى اتصرف اعمل اى حاجه

ميدو : طيب اوصفيلى المكان الى انتوا فيه

كريمه : اوصفلك ايه يا سوادى يعنى خير اللهم ما اجعله خير الجنه بس جالبه على صفار شويه

انت اهبل يلا ماهى كله صفار فى صفار مفيش غير الرمل والصحرى انا اتلميت على شويه

مخابيل فى ايامى دى

ميدو : طيب اهدى يا كريمه وانا هرجع من نفس السكه الى جينا منها وان شاء الله هلاقيكوا

كريمه : طيب بسرعه يلا

ميدو رجع من نفس المكان والحمد لله لقى ندى وكريمه

وخدهم ورجعوا الفندق طبعا كريمه زاد اعجابها بميدو وبالحركه الجدعه الى عملها بعد اما وصلوا الفندق

كريمه : عارف يلا يا محمد مع انك ولا دزمه بس طلعت جدع شكرا يلا انك رجعتنا

ميدو : مفيش شكر ده واجب واحنا اصحاب ولازم اعمل كده

وخصوصا انك انتى كمان الى كنتى تايهه

كريمه : خلاص يا ولا انت ما صدجت ولا ايه هاتاخدها حلوانه فى سلوانه

وتتساير يلا بجى شوف انت رايح فين

وخلص اليوم بالاعجاب الجميل بين كريمه وميدو


توقيع القلب الطيب

سبحان الله وبحمده سبحان الله العظيم

ا
للهم انصر مصر

انت مصرى ارفع راسك




ام سليمان
الصورة الرمزية ام سليمان
عضو سوبر سوبر سوبر ستار

رقم العضوية : 5114
الإنتساب : Nov 2010
المشاركات : 395
بمعدل : 0.10 يوميا

ام سليمان غير متواجد حالياً عرض البوم صور ام سليمان



  مشاركة رقم : 2  
كاتب الموضوع : القلب الطيب المنتدى : قسم القصة
افتراضي
قديم بتاريخ : 01-25-2011 الساعة : 08:21 AM

روعه جزاكم الله خير




توقيع ام سليمان

أحبك ربي...يامن وهبتني الحياة... وعلمتني كيف احبها..
وألهمتني كيف أحب من فيها فيك..وأنتظر لقائك ...وأشتاق لرؤياك..وأتقرب اليك شوقا..وطمعا في رحمتك




القلب الطيب
الصورة الرمزية القلب الطيب
عضو رائع

رقم العضوية : 5195
الإنتساب : Dec 2010
العمر : 68
المشاركات : 93
بمعدل : 0.02 يوميا

القلب الطيب غير متواجد حالياً عرض البوم صور القلب الطيب



  مشاركة رقم : 3  
كاتب الموضوع : القلب الطيب المنتدى : قسم القصة
افتراضي
قديم بتاريخ : 01-27-2011 الساعة : 08:37 PM

شكرا لمرورك الطيب يا ام سليمان


توقيع القلب الطيب

سبحان الله وبحمده سبحان الله العظيم

ا
للهم انصر مصر

انت مصرى ارفع راسك



إضافة رد

المواضيع المتشابهه
الموضوع كاتب الموضوع المنتدى مشاركات آخر مشاركة
المحتال وزوجته ( قصه مضحكه ) القلب الطيب قسم القصة 2 03-14-2011 10:06 PM

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة


الساعة الآن 05:14 PM


Powered by vBulletin® Copyright ©2000 - 2022, Jelsoft Enterprises Ltd. TranZ By Almuhajir

جميع الأراء والمواضيع المنشورة تعبر عن رأي صاحبها ، وليس بالضرورة أن تعبر عن رأي إدارة المنتدى

الموقع غير مسئول عن أي اتفاق تجاري أو تعاوني بين الأعضاء فعلى كل شخص تحمل مسئولية نفسه تجاه ما يقوم به من بيع أو شراء أو إتفاق

استضافة وتصميم : المصرية للأنظمة الرقمية والخدمات المتكاملة